Бесими: Компаниите имаат можност до 15 април да аплицираат за поддршка на платите за февруари и март


Веќе почнаа да се гласа за законите од четвртиот и од петтиот сет на економски мерки за поддршка на стопанството и граѓаните од пандемијата со коронавирусот, а со амандманско решение на компаниите им се дава можност до 15 април да аплицираат за мерката за поддршка на платите на вработените за февруари и за март, најави денеска министерот за финансии Фатмир Бесими.

– Со цел да се намалат административните постапки во однос на реализација на мерката, сега фирмите може да аплицираат со една апликација за двата месеца. Со тоа сметаме дека ќе може да се реализира мерката затоа што институциите и УЈП се спремни за да ја реализираат веднаш откако ќе биде донесена од Собранието, рече Бесими во одговор на прашање на денешната прес-конференција во Владата.

За тврдењето на опозицијата дека власта ги зголемила акцизите на нафтените деривати за да го полни Буџетот, Бесими рече дека акцизните стоки се само еден дел од буџетските приходи.

– Реализацијата на Буџетот не се заснова само на акцизните стоки, туку генерално во сите ставки на страната на приходите на Буџетот и кај сите даноци и кај придонесите, вклучително на тоа и увозните давачки и акцизите, прецизира Бесими. вј/сп/

Скопје, 8 април 2021 (МИА)


Видете следно

Пролетни средби на ММФ и Светската банка: Одлуките и мерките на Народната банка придонесоа за јакнење на стабилноста на банкарскиот систем и за кредитирањето

Одлуките и мерките на Народната банка донесени од почнувањето на корона-кризата наваму се позитивно оценети …