ЈП Водовод и канализација- Скопје и граѓаните во заедничка акција за поддршка на СОС Детско село


ЈП Водовод и канализација – Скопје во април оваа година започна иницијатива за донирање средства за децата и младите од СОС Детско село. Bработените од ова јавно претпријатие ќе се приклучат кон акцијата за редовно месечно донирање со цел да обезбедат континуирана поддршка на децата и младите од СОС Детско село, а дополнително се поставени и касички за донација на наплатните пунктови за да можат граѓаните да донираат.

– Потенцирајќи ја увереноста и позитивната мисла дека љубовта и грижата се неопходни за среќно и безгрижно детство, како што е водата за животот, ги повикаа нивните корисници да донираат. Граѓаните со огромни симпатии ја прифатија иницијативата да ги поддржат децата и да донираат според своите можности и покрај тоа што кампањата се одвиваше во вонредни услови, за време на рестриктивни мерки поврзани со коронавирусот., соопштија денеска од ЈП Водовод и канализација – Скопје.

Јулијана Накова Гапо, национален директор на СОС Детско село, во врска со акцијата на ЈП Водовод и канализација – Скопје објаснува дека СОС Детско село прв пат остварува партнерство со јавно претпријатие и тоа покажало дека во нашата заедница има простор за нови и креативни можности и оти секогаш е вистинско време за добри дела. Таа изразува огромна благодарност до ЈП Водовод и канализација – Скопје, но и до сите граѓани кои земаа учество во донаторската кампања.

– Ако мислата ја претвориме во денар, од април до јуни 2020 година, кон децата од СОС Детско село, испратени се точно 374.944,00 убави мисли. Толку средства се собрани од страна на граѓаните, а на повик за донација од страна на нашите пријатели од ЈП Водовод и канализација – Скопје. Нам многу ни значат овие средства, посебно сега, во оваа нова предизвикувачка реалност за сите нас. Сакам да потенцирам дека уште повеќе ни значи поддршката, добрите мисли кои се испраќаат кон децата и младите дека граѓаните и заедницата се грижат за нив, но и довербата која  ја даваат на СОС Детско село, вели Јулијана Накова Гапо, се наведува во соопштението.

Се апелира до останатите општествено одговорни компании, но и до секој поединец, да се сетат на децата и младите без родителска грижа и оние во социјален ризик за кои СОС Детско село се грижи веќе 19 години, на нивната потреба да бидат поддржани, сакани и среќни.

– Ние веруваме дека ниту едно дете не треба да расте само, а на овој начин и Вие ќе покажете дека мислите на нив. Колку повеќе се здружуваме заедно, толку повеќе децата и младите ќе имаат сигурна и светла иднина. Секоја помош и поддршка е потребна и неопходна. Сите кои сакаат да помогнат, можат како и досега, да продолжат да донираат он-лајн. Но, на ваше барање ја отворивме можноста и за редовно месечно донирање, стои во соопштението од ЈП Водовод и канализација – Скопје.

Скопје, 22 јули 2020 (МИА) 


Видете следно

Зајакнати мрежните капацитети на операторите, засега нема промени во цените

Скопје, 8 август 2020 (МИА) – Агенцијата за електронски комункации (АЕК) ги спроведе во пракса …