Одлука за основање Центар за култура на турската заедница во Северна Македонија


Одлука за основање национална установа „Центар за култура на турската заедница во Република Северна Македонија“ – Скопје е донесена денеска на седница на Владата, на предлог на Министерството за култура.


Како што информираат од владината прес-служба, НУ „Центар за култура на турската заедница во Република Северна Македонија“ – Скопје ќе има за цел да ги негува, не само класичните уметнички форми, туку и постојано да ги следи и истражува модерните движења во сферата на културата и уметноста, со што на сите заинтересирани граѓани ќе им овозможи врвни културни и уметнички достигнувања.


– Во образложението на предлагачот, Министерството за култура, е посочено дека во Република Северна Македонија работи и функционира само една национална установа којашто негува репертоар на којшто се застапени турски, македонски и светски драмски автори, а претставите се изведуваат на турски јазик со симултан превод на други јазици, односно само Националната установа Турски театар – Скопје, поради што е евидентен недостигот на културни институции за негување и афирмација на културните вредности од турската заедница во Република Северна Македонија, се вели во соопштението. сх/лв/

Фото: МИА архива


Скопје, 29 март 2023 (МИА)