Петровска го назначи Владимир Анчев за државен секретар во Министерството за одбрана


Денеска, министерката за одбрана Славјанка Петровска го назначи Владимир Анчев за државен секретар во Министерството за одбрана.

Анчев во својата кариера има работено на бројни менаџерски позиции во јавниот и во приватниот сектор. Во речиси две деценискиот работен ангажман има стекнато богато искуство во доменот на меѓународната соработка и менаџментот на човечките ресурси – првенствено во рамки на Универзитетот „Св. Кирил и Методиј” како соработник за меѓународна соработка, а потоа и во Генералниот секретаријат на Владата и Министерството за информатичко општество и администрација каде фокусот го става на развојот на софтвер за управување со човечки ресурси за 1.300 институции, како и воведување и одржување на стандарди за управување со квалитет.


Работната кариера ја продолжува во приватниот сектор како менаџер за човечки ресурси, каде го води процесот за воведување на оддел за човечки ресурси и подготовка на правилници за внатрешна организација, како и анализа на трудот и спроведување на функционална анализа.

Во Министерството за одбрана работи од октомври 2020 година како посебен советник, а од декември 2021 активно придонесува во функционирањето на Министерството како државен советник.


Анчев има организирано голем број обуки од областа на менаџментот со посебен фокус на човечките ресурси, член е на Македонската асоцијација за човечки ресурси и Регионалната школа за јавна администрација, а автор е и на поголем број истражувачки трудови посветени на развојот на системот за јавна администрација.

Тој дипломирал право на Правниот факултет „Јустинијан Први” на Универзитетот „Св. Кирил и Методиј”.



Видете следно

Францускиот амбасадор Бомгартнер во посета на Собранието

Францускиот амбасадор во земјава Сирил Бомгартнер денеска ќе го посети Парламентот и ќе се сретне …