РСБСП со апел: Биди одговорен учесник во сообраќајот! Биди дел од акцијата „Европски ден без жртви во сообраќајот“


Безбедноста во сообраќајот на патиштата претставува сериозен предизвик, односно сериозен проблем во сите современи општества. Секојдневно на улиците ширум Европа, се случуваат сообраќајни незгоди со фатални последици, предизвикани од неодговорни возачи, возачи под дејство на алкохол итн. Соочувајки се со растечкиот и загрижувачки тренд на зголемен број настрадани лица во сообраќајни незгоди, покрената е иницијатива со која 19 септември 2018 година, се прогласува за Европски ден без жртви во сообраќајот.

Брзината и брзото возење и понатаму остануваат критичен ризик-фактор што предизвикува сообраќајни незгоди со сериозни и фатални последици. Околу 40% од сообраќајните незгоди се предизвикани при возење со брзина поголема од дозволената. Според истражувањата, намалување на просечната брзина за 5% може да резултира со намалување на бројот на фатални сообраќајни незгоди за 30% .

Токму затоа, оваа година Европскиот ден без жртви во сообраќајот, се реализира под мотото „Намалувањето на брзината спасува животи“.

Секојдневно на улиците и на патиштата ширум светот, животот го губат околу 3500 лица, а околу 140 000 лица се повредени во сообраќајни незгоди.

Републичкиот совет за безбедност на сообраќајот на патиштата повикува да ја поддржиме иницијативата за одбележување на Европскиот ден без жртви во сообраќајот. Акцијата „Европски ден без жртви во сообраќајот“ се одбележува во сите земји во Европа, а целта на акцијата е за само еден ден да бидат спасени 3500 човечки животи. Секој од нас поединечно и сите ние заедно можеме да го направиме сообраќајот побезбеден. Можеме за само еден ден да спасиме 3500 човечки животи и многу повеќе доколку секој ден бидеме дисциплинирани и одговорни учесници во сообраќајот.

Сообраќајна дисциплина, почитување на сообраќајните правила и прописи, почитување на поставената сообраќајна сигнализација, почитување на правилата за ограничување на брзината, неуправување моторно возило под дејство на алкохол, технички исправно возило,  користење безбедносен појас и заштитна кацига, користење детско седиште, некористење мобилен телефон при управување со возило … и многу други едноставни, добри и позитивни навики, спасуваат човечки животи.

РСБСП со апел: Биди позитивен пример за безбедно учество во сообраќајот! За сообраќај без жртви – биди дел од кампањата „Европски ден без жртви во сообраќајот“!


Видете следно

Oбезбедени се средства за заокружување на „Ветерен парк Богданци“

Потпишани се спогодба и договор за обезбедување средства за изградба на втората фаза од проектот …