Шекеринска: Наместо да обвинува, опозицијата барем еднаш да помогне за националните цели


Со Софија разговараме како да го надминеме впечатокот кој тие го имаат дека спроведувањето на Договорот за пријателство не е на посакуваното ниво, и да добиеме поддршка за почеток на преговорите, вели министерката за одбрана Радмила Шекеринска.

-Мислам дека сите овие прашања се прашања коишто треба да ги поставите на луѓето коишто се вклучени во преговорите. Меѓутоа, мислам дека тие веќе ви дале одговор. Дискутираме како да го надминеме впечатокот кој го има Бугарија дека спроведувањето на Договорот за пријателство не е на нивото кое што го посакуваме, но најважно од се дискутираме како да ја добиеме и нивната поддршка бидејќи останатите држави членки на ЕУ се сложни да ги почнеме преговорите и да се организира првата меѓувладина конференција, вели министерката Шекеринска.


Во одговор на новинарско прашање за обвинувањата од опозицијата за национално предавство, таа посочи на изјавата на премиерот Зоран Заев дека идентитетските прашања не се на масата на разговори со Бугарија.

-Премиерот имаше многу јасна изјава дека темите коишто се однесуваат на нашиот идентитет, прашањето од типот на македонски јазик, македонски идентитет не дозволува да бидат ставени на масата за преговори. Но, за сите други прашања коишто значат добри меѓусоседски односи и кои можат да ни ги отворат европските врати сме подготвени да дискутираме затоа што имаме доверба во себе, во нашата држава, во нашата историја и во нашиот идентитет, рече Шекеринска


Според неа, четири години ги слушаме обвинувањата, а после четири години можеме да кажеме дека државата успеа во својот прв стратешки приоритет да стане членка на НАТО и, вели, во овие турбулентни времиња кога многумина не плашат со промени на граници, со нон пејпери да обезбедиме на нашите граѓани и на нашите институции чувство за безбедност и сигурност.

-Наместо обвинувања, мислам дека би било корисно опозицијата барем еднаш да се потруди да ги помогне овие национални цели. Затоа што лесно е да се престроите пред Владата, пред Собранието кога ќе се дига знамето на НАТО, ама тешко е тоа да го сработите. Лесно е денеска да обвинувате, тешко е да помогнете. Денеска сме членка на најмоќната Алијанса. Денеска сме држава во која новинарите веќе не се плашат ниту да поставуваат прашања, ниту да ја критикуваат владата. Денеска сме држава со најголема транспарентност во нашиот регион и тоа не е дело на национално предавство, туку тоа е дело на луѓе коишто сакаат државата да ја направат подобра од што била вчера. Затоа мислам дека и граѓаните се заморени од обвинувања, сакаат да видат акција, а таа акција да не биде спротивна туку во полза на интересите, вели Шекеринска. вг/са/

Скопје, 4 јуни 2021 (МИА)


Видете следно

Одбележан Европскиот ден за борба против трговија со луѓе и јубилејот 20 години од основањето на Националната комисија за борба против трговија со луѓе и илегална миграција

Националната координаторка за борба против трговија со луѓе и илегална миграција и државна секретарка на …