Силјаноска – Давкова: 40 отсто застапеност на жени во политиката, пет отсто од БДП средства за унапредување на образованието, за 500 најдобри студенти сигурна работа


Носителката на изборна единица 1, Гордана Силјаноска Давкова при посетата на село Шишево во општина Сарај истакна дека ВМРО-ДПМНЕ и коалицијата „За обнова на Македонија” се залага за 40 отсто застапеност на жени во политиката по примерот на скандинавските земји.

– Ќе има 40 отсто жени во политиката. Мислам дека е тоа нешто како во скандинавските земји ако можам да потсетам. Тоа не е отстапка, туку тоа е свест дека има многу неискористено знаење ум креација, оти ќе се согласат мажите дека ние жените имаме потежок животен пат ама тоа не прави посилни и ако на тоа го додадете родителството, мајчинството тогаш и одговорноста е тука, рече Силјаноска – Давкова.

Потенцираше дека ВМРО ДПМНЕ е единствената партија која се грижи за македонските интереси и дека се повеќе луѓе го препознаваат ова и се приклучуваат кон јадрото на таа партија и коалицијата „За Обнова на Македонија”.

– Нема место во моето срце и мојот ум за Северна, тоа е невозможно. Кога сте се родиле во Македонија кога сте растеле во Македонија кога сте постигнале се во животот во Македонија како може сега да умрете во Северна, а немало војна, иста е територијата и се што било во мојот живот врзано за идентитетот било врзано за македонски јазик, македонска држава, македонско народно ослободителна војна и доаѓа еден момент кога се почесто луѓе особено оние надвор во дијаспората велат сите сме ВМРО, појасни Силјаноска- Давкова.

Посочи дека младите се во главниот фокус на програмата на ВМРО ДПМНЕ, каде има проекти за мотивација на најдобрите 500 студенти на кои ќе им се нуди сигурна работа и дополнително огромен број иновативни проекти за вмрежување на младите луѓе за нивна идна соработка и надградба. Таа порача дека ВМРО-ДПМНЕ ќе издвојува и до пет отсто од Бруто домашниот производ средства за унапредување на образованието.

– Најдобрите ученици, 500 најдобри секоја година ќе бидат повикувани од самите министерства од владата за да им биде понудена работа, за да не заминуваат како готов производ бесплатен надвор. Ќе направиме и систем една мрежа на сите кои се надвор и сите кои се овде во определена професија за да соработуваат. За да може нашите иселеници надвор кои се подобри амбасадори од многу македонски амбасадори да имаат постојан контакт со земјата. Во образованието денеска има некаде околу 3,7 отсто од БДП, малку е тоа кога споредуваме со регионот. Нашата заложба е пет отсто барем да се вложуваат. Денеска се вели дека науката е најважна, дека кога ќе вложите во наука кога ќе инвестирате, инвестирате во иднината инвестирате во индустријата, во производството и тоа ќе ни се врати повеќекратно, додаде Силјаноска – Давкова.

Скопје, 29 јуни 2020 (МИА)


Видете следно

Ангеловска: Приходите подобри од очекувањата, буџетот ликвиден, економијата се ревитализира

Реализацијата на вкупните приходи во буџетот е подобра од очекувањата. Во јуни таа е пониска …