ТикТок планира да поднесе тужба против извршната наредба на Трамп


Пекинг, 23 август 2020 (МИА) – ТикТок соопшти дека планира да поднесе тужба против извршната наредба на американскиот претседател Доналд Трамп, со која се забранува трансакции меѓу оваа популарна видео апликација и нејзината кинеска матична компанија „ByteDance”, пренесуваат британските медиуми.

ТикТок преку соопштение порача дека речиси една година се обидувале да разговараат со администрацијата на претседателот Трамп, но дека обидите не вродиле со плод.

„Со намера да се осигураме дека се почитува владеењето на правото и дека нашата компанија и клиенти имаат фер третман, ние немаме друг избор освен да се обидеме извршната наредба да ја оспориме преку правниот систем”, изјави портпаролот на „ТикТок”.

Трамп, на 14 август, издаде извршна наредба со која на „ByteDance” и беше даден рок од 90 дена да ги прекине операциите на „ТикТок” во САД.

„ByteDance” постигна напредок во разговорите со потенцијалните купувачи, вклучувајќи ги и Мајкрософт и Оракл, додека во процесот на наддавање можеа да се вклучат и некои американски инвеститори на оваа компанија.

Американските власти се плашат дека информациите за корисниците на „ТикТок” можат да и бидат предадени на кинеската Влада.

Никој од Белата куќа не е достапен за коментар за најновата најава на компанијата.


Видете следно

Детален увид во процесите на увоз и извоз при купување преку интернет

Асоцијацијата за е-трговија на Македонија (АЕТМ) преку платформата „eCommerce4All.mk” на едно место ги прикажува сите …