Заев: Европеизацијата на општеството и членството во ЕУ немаат алтернатива, без разлика на разочарувањето


Скопје, 22 јули 2021 (МИА) – Не станува збор просто само членството во ЕУ, за нас клучна цел европеизацијата на нашата земја. Покажавме вистинска посветеност на овој процес и покрај тоа што од 2005 година сме земја кандидат и 16,5 години чекаме да се случи следниот чекор. На јасно сме дека до членството ќе поминат можеби уште пет, седум или 10 и повеќе години, но ЕУ е неопходно да ги исполни своите ветувања, да ни овозможи да го направиме следниот чекор, истакна премиерот Зоран Заев во емисијата „Конфликт зоун” на „Дојче веле” на англиски јазик, наведувајќи притоа дека за жал ЕУ не го испорача ветувањето пред граѓаните на Република Северна Македонија и оти сега разочарувањето е навистина големо.
Заев посочи дека европеизацијата и членството во ЕУ немаат алтернатива, пред се поради вредностите на Унијата кои, како што вели, значат подобра и просперитетна иднина, но, додаде дека земјите од Западен Балкан, кои се како своевиден остров оставен во ЕУ, на овој начин се оставаат на можноста да се соочат со други влијанија.

Во однос на нашиот европски пат со Албанија, премиерот Заев истакна дека станува за збор за спојување од практична причина, при што наведе дека секоја земја треба да се оценува самостојно, иако во слична ситуација се најдовме пред неколку години, но во обратна насока кога патот на Тирана беше блокиран.


Премиерот Заев посочи дека оваа Влада преку Договорот од Преспа со Грција и со Договорот за добрососедство и соработка со Бугарија успеа во еден европски манир да реши децениски прашања.

Во насока на европеизацијата на нашата земја, премиерот Заев истакна дека Северна Македонија е позитивен пример во регионот како мултиетничка и мултиконфесионална функционална демократија.

Во однос на пречките со Бугарија на нашиот европски пат, тој изрази оптимизам дека по формирањето на политичка Влада во Софија се отвора можност за надминување на овие прашања и посочи дека Владата на Северна Македонија го задржува курсот на посветеност и пријателство. сст/


Видете следно

Пратениците на одмор, локалните избори ќе се распишат на 6 август

Пратениците се на годишен одмор. Претседателот на Собранието Талат Џафери локалните избори ќе ги распише …